បាត់ដំបង៖ ពលករខ្មែរជាង ២០០នាក់ត្រូវបានទាហានថៃបញ្ជូនត្រឡប់មកស្រុកកំណើតវិញក្រោយពិនិត្យឃើញថាបានលួចឆ្លងដែនដោយខុសច្បាប់។
សមត្ថកិច្ចជំនាញបានប្រាប់ឲ្យដឹងនៅថ្ងៃទី៣០ ខែធ្នូ ឆ្នាំ២០២១ ថាកម្លាំងប្រចាំការគោលដៅតំបន់ព្រំដែនបានទទួលពលករខ្មែរចំនួន ២០៣នាក់ ពីទាហានថៃនៅត្រង់ចំណុចច្រកទ្វារតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។
ពលករដែលធ្វើចំណាកស្រុកខុសច្បាប់ទាំង ២០៣នាក់ រួមមានបុរសចំនួន ៨១នាក់ ស្ត្រីចំនួន ៧៤នាក់ ក្នុងនោះម្នាក់ផ្ទុកជំងឺកូវីដ-១៩ រួមទាំងក្មេងចំនួន ៤៨នាក់ផងដែរ។
បន្ទាប់ពីទទួលពលករខ្មែរខាងលើក្រុមគ្រូពេទ្យបានពិនិត្យសុខភាព និងធ្វើតេស្តរហ័សជាលទ្ធផលវិជ្ជមានកូវីដ-១៩ ម្នាក់បានបញ្ជូនទៅព្យាបាលនៅមណ្ឌលព្យាបាលត្រាវជូរ ចំណែកពលករចំនួន ១២៤នាក់ដែលទទួលវ៉ាក់សាំងរួច អនុវត្តវិធានការអប់រំណែនាំហើយឲ្យវិលត្រឡប់ទៅកាន់លំនៅដ្ឋានរៀងៗខ្លួនវិញ ក្រៅពីនេះបញ្ជូនទៅធ្វើចត្តាឡីស័កនៅមណ្ឌលគីឡូ៩ ស្រុកសំពៅលូន៕
